Cabdullaahi “Fartaag” waxa uu leeyahay waayo-aragnimo ka badan 30 sano oo uu kasoo shaqeeyay hoggaanka amniga iyo ciidamada, heer qaran iyo heer dowlad goboleedba. Waxa uu waxbarashadiisa militari ku qaatay Akadeemiyadda Jaalle Siyaad, halkaas oo uu kaga soo baxay sarkaal leh aqoon iyo xirfad sare. Intii uu ku jiray Ciidanka Xoogga Dalka Soomaaliyeed, waxa uu caan ku noqday hoggaan adag, karti xeeladaysan, iyo dadaal joogto ah oo uu ku horumarinayo hay’adaha amniga.

Waxa uu soo qabtay xilal muhiim ah oo ay ka mid yihiin hoggaaminta dib-u-habaynta Ciidanka Xoogga Dalka, taliyaha cutubyo muhiim ah, iyo door firfircoon oo uu ka qaatay sugidda amniga gobollada koonfureed ee Soomaaliya.

Sanadihii 2013 ilaa 2016, Cabdullaahi “Fartaag” waxa uu ahaa Madaxweyne Ku-xigeenkii Dowlad Goboleedka Jubbaland, halkaas oo uu xoogga saaray nabadaynta, xasilinta, iyo dhismaha hay’adaha amniga. Khibraddaas hoggaamineed ayaa u gogol xaaray inuu si qoto dheer uga qayb qaato siyaasadda qaran.

Laga soo bilaabo 2016, waxa uu xubin ka yahay Aqalka Sare ee Baarlamaanka Federaalka Soomaaliya, waxaana dib loogu doortay xilkaas sanadkii 2021. Intii uu ahaa Senator, waxa uu hormuud ka ahaa dadaallada lagu xoojinayo amniga, sharciyeynta, iyo hirgelinta nidaamka federaalka.

Bishii Abriil 2024, Ra’iisul Wasaaraha Xukuumadda Federaalka Soomaaliya ayaa u magacaabay Wasiirka Amniga Gudaha, isagoo ku mutaystay khibraddiisa, kartidiisa hoggaamineed, iyo doorkiisa muuqda ee horumarinta amniga iyo nabadda dalka.

Cabdullaahi Sheekh Ismaaciil “Fartaag” waa hoggaamiye aragti dheer leh, kuna suntan daacadnimo, karti, iyo u heellan horumarinta amniga iyo midnimada Soomaaliya.